Imfungwa zibarirwa muri mirongo zarashwe mu cyico izindi zibarirwa mu magana zirakomereka, ubwo zageragezaga gutoroka gereza Nkuru ya Makala.
Iyi gereza iherereye i Kinshasa ni yo nini kurusha izindi muri Repubulika Iharanira Demokarasi ya Congo. Imfungwa zibarirwa mu 15,000 zirimo abasirikare barenga 4,000 ni zo ziyifungiyemo n’ubwo yo ubwayo ifite ubushobozi bwo kwakira izibarirwa mu 1,500.
Mu Rukerera rwo kuri uyu wa Mbere tariki ya 2 Nzeri ni bwo kuri iyi gereza humvikanye urusaku rw’amasasu menshi.
Minisitiri w’Itumanaho muri RDC akanaba Umuvugizi wa Guverinoma y’icyo gihugu, Patrick Muyaya, yanditse ku rubuga rwe rwa X ko irasana ryabereye kuri iyi gereza ryatewe n’uko hari imfungwa zageragezaga gucika.
Muyaya yunzemo ko inzego z’umutekano zahise zoherezwa kuri iriya gereza mu rwego rwo kugarura ituze.
Hagati aho umwe mu bayobozi b’iriya gereza yabwiye Jeune Afrique ko “inyinshi mu mfungwa zageragezaga gutoroka zishwe”.
Amakuru y’ibanze avuga ko imfungwa zirenga 70 ari zo zarashwe mu cyico, mu gihe izirenga 200 zakomeretse. Ni imibare icyakora ishobora kwiyongera.
Amashusho ateye ubwoba akomeje gukwirakwizwa ku mbuga nkoranyambaga yerekana imirambo y’imfungwa nyinshi zarashwe.
Amakuru kandi avuga ko imfungwa nyinshi z’igitsina gore zari zifungiye muri iriya gereza zafashwe ku ngufu, ndetse zimwe mu nyubako zayo ziratwikwa.
Ibi byabaye mu gihe Perezida Félix Antoine Tshisekedi ari mu ruzinduko mu Bushinwa, mu gihe Minisitiri w’Intebe, Tuluka Suminwa n’abandi baminisitiri benshi na bo batari muri Kinshasa.
