Perezidansi ya Repubulika Iharanira Demokarasi ya Congo yatangaje ko Perezida w’iki gihugu, Félix Antoine Tshisekedi Tshilombo ari i Bruxelles mu Bubiligi, aho yagiye kwivuriza.
Ni amakuru ibiro bya Tshisekedi byemeje mu itangazo byasohoye kuri uyu wa Gatatu tariki ya 31 Nyakanga.
Ni Tshisekedi wari utegerejwe mu mujyi wa Kisangani ho mu ntara ya Tshopo, aho yagombaga kwitabira umuhango wo kwibuka ibyo RDC yita Jenoside yakorewe abanye-Congo.
Umuyobozi ushinzwe itumanaho muri Perezidansi ya RDC, Eric Nyindu, mu itangazo yasohoye yavuze ko Tshisekedi atacyitabiriye uriya muhango bijyanye no kuba yaragiye kwivuza i Bruxelles.
Yagize ati: “Umukuru w’Igihugu kuri ubu yerekeje mu Bubiligi aho yagiye gukurikiranirwa n’abaganga ngo bamuvure ’disc’ (z’urutirigongo) zanduye. Mbere y’urugendo rwe, yarimo yitabwaho n’itsinda ry’abaganga be mu bitaro bya gisirikare bya Camp Tshatshi.”
Perezidansi ya RDC ivuga ko umuhango Tshisekedi yagombaga kwitabira azawuhagararirwamo na Minisitiri w’Intebe, Judith Tuluka Suminwa.
I Kinshasa baravuga ko Tshisekedi yagiye kwivuza disc z’umugongo, mu gihe hari andi makuru avuga ko yaba yaragiye kwivuza umutima.
Ni amakuru yatangajwe bwa mbere n’umunyamakuru Pero Luwara wemeje ko Tshisekedi yageze mu bitaro bya Saint-Elizabeth by’i Bruxelles mu minsi ine ishize.
Uyu yavuze ko Perezida wa RDC arembejwe n’umutima ndetse ko anashobora kubagwa.
