Igisirikare cya Israel (IDF) kuri uyu wa Kane tariki ya 1 Kanama 2024 cyemeje ko cyivuganye Mohammed Deif wari ukuriye igisirikare cy’umutwe wa Hamas.
Deif yiciwe mu bitero indege z’intambara za Israel zagabye mu gace ka Khan Yunis ku wa 13 Nyakanga uyu mwaka.
IDF yemeje urupfu rwe nyuma y’igihe ikusanya amakuru y’ubutasi.
Mohammed Deif ashinjwa kuba ari we wateguye akanashyira mu bikorwa ibitero Hamas yagabye mu majyepfo ya Israel ku wa 7 Ukwakira 2023.
Ni ibitero byiciwemo ababarirwa mu 1,200 na ho abantu 251 bafatwa bugwate mbere yo kujyanwa muri Gaza Strip.
Israel yemeje ko yivuganye uyu mugabo nyuma y’amasaha make Hamas itangaje ko Ismail Haniyeh wari umuyobozi mukuru w’ishami ryayo rya Politiki Israel yamwiciye muri Iran.
