Ihuriro AFC ribarizwamo umutwe wa M23, kuri uyu wa Kane ryatangaje ko ritarebwa n’imyanzuro abakuru ba dipolomasi y’u Rwanda na RDC baheruka gufatira mu nama yabereye i Luanda, bijyanye n’uko ritigeze riyitabira.
Ku wa Kabiri tariki ya 30 Nyakanga ni bwo ba Minisitiri b’Ububanyi n’Amahanga b’u Rwanda na RDC bahuriye i Luanda, mu nama ya kabiri yo ku rwego rwa ba Minisitiri yari igamije gucoca ibibazo byo mu burasirazuba bwa Congo.
Ni inama yanitabiriwe na Minisitiri w’Ububanyi n’Amahanga wa Angola, nk’igihugu cy’umuhuza mu bibazo bya Politiki bimaze igihe hagati ya Kigali na Kinshasa.
Iyi nama yasize ba Minisitiri b’Ububanyi n’Amahanga ba Repubulika Iharanira Demokarasi ya Congo, Angola n’u Rwanda “bumvikanye ku ihagarikwa ry’imirwano hagati y’impande zishyamiranye mu burasirazuba bwa Congo”.
Ni agahenge kazatangira kubahirizwa saa sita z’ijoro zo ku wa 4 Kanama 2024.
AFC/M23 iri mu barebwa n’aka gahenge mu itangazo yasohoye, yagaragaje ko itarebwa n’ibyemerejwe mu nama ya Luanda bijyanye no kuba itarigeze iyitabira.
Yagize iti: “Alliance Fleuve Congo (AFC) yakurikiranye ibikorwa biheruka kuba bigamije kugera ku mahoro biciye mu biganiro bya Luanda. AFC irifuza gushimira ababyitabiriye ku bw’akazi kadashira bakomeje gukora kugira ngo ibibazo byo mu burasirazuba bwa RDC bikemuke mu mahoro. AFC icyakora irashimangira ko itarebwa n’imyanzuro y’inama itigeze yitabira”.
Iri huriro ryagaragaje ko ihuriro ry’Ingabo za Guverinoma ya RDC ryakunze kwifashisha uduhenge dutandukanye mu kwisuganya, mu rwego rwo gukora ubwicanyi bushingiye ku bwoko, kugaba ibitero ku basivile ndetse no ku ngabo zayo.
Ryavuze ko nko ku wa 7 Werurwe 2023 M23 yatangaje ko itanze agahenge nk’uburyo bwo guha amahirwe inzira yo gukemura amakimbirane mu mahoro, gusa birangira Ingabo za leta ziyigabyeho ibitero ku buryo yisanze igomba kwirwanaho mu rwego rwo kurinda abaturage b’abasivile.
AFC ivuga ko icyiteguye kwirwanaho mu gihe cyose ingabo za Leta ya Congo zizagaba ibitero ku ngabo zayo.
Iri huriro rivuga ko umuti w’amakimbirane yo muri Congo uzagerwaho ari uko ugiranye ibiganiro na Guverinoma ya Kinshasa mu rwego rwo gushakira umuti umuzi w’amakimbirane.
